Assalawma a’leykum hu’rmetli Danaliq radiosi tin’lawshilari. Sizler menen efir arqali ushrasip turg’animizdan ju’da quwanishlimiz. Doslar, bu’gin sizler menen sport haqqinda sa’wbetlespekshimiz. Sport arqali ko’plegen adamlar du’nyada taniqli bolip atir.

Ha’tteki o’zlerinin’ ma’mleketin de pu’tkil du’nyag’a belgili etip atir. Ko’plegen sportshilar material jag’inan da erisedi. Demek, sport arqali tek g’ana jaqsi na’rselerge iye boliwimiz mu’mkin eken. Ha’zirgi ku’ni bizlerdin’ ma’mleketimizde de sportqa ko’p itibar berilip atir. Ha’tteki awillarimizda da a’jayip sport orinlari qurilip atir. Bul o’zlerimiz ha’m balalarimiz ushin a’jayip itibar degendi an’latadi.

Qa’dirli doslar, erterekte jasliq da’wirde bunday imkaniyatlar ju’da az edi. A’sirese ha’zirgi ku’ni qalada ha’r qa’demin’izde sport imaratlarin tan’lap, o’zin’izge en’ qolayli bolg’anin tan’lawin’iz mu’mkin. Usi orinda perzentlerimiz haqqinda da biraz pikirlessek. Balalarimizdi da jaslig’inan sporttin’ qa’legen tu’rine qiziqtirsaq, ba’lkim keleshekte a’jayip sportshi bolip jetiliser.

Doslar, balalarimizdi a’piwayi sport tu’ri menen bolsada shug’illaniwina imkaniyat jaratip bereyik. Sport adamnin’ den-sawlig’in tek g’ana bekkemlep qoymay, adamnin’ kewilin de ku’n boyi jaqsi o’tiwine alip keledi. Eger u’yde ata-ana a’piwayi dene shinig’iwi menen shug’illansa, balalar da ata-anasinan jaqsi o’rnek aladi. Spirtli ishimlikler yamasa sigaret shegiw, usig’an uqsas jaman a’detler adamg’a tek g’an ziyan keltiriwi aniq.

Qa’dirli doslar, kelin’ o’zlerimiz ha’m shan’araq ag’zalarimizdi sporttin’ tu’rlerine qiziqtiramiz. Quday bergen bul denemizdi ha’m den-sawlig’imizdi jaqsi asirawg’a ha’reket etemiz. Doslar, usinin’ menen bu’gingi sport haqqindag’i esittiriwimiz o’z juwmag’ina jetti. Den-sawlig’in’iz bekkem boliwin tilep, sizler menen ha’zirshe xoshlasip qalamiz.