Assalawma a’leykum qa’dirli tin’lawshilar. Sizler menen usi qisqa waqit ishinde ja’ne men Sarbinaz. “Ko’z kewildin’ aynasi” degen eken bir dana adam. Haqiyqatinda da adamnin’ ko’zleri insan haqqinda ko’p na’rselerdi aytiwi mu’mkin. Adamnin’ ju’zine qarap onin’ kim ha’m qanday ekenligin adaspay aytiwimiz mu’mkin dep oylayman. Miyirimli adamnin’ ko’zleri onin’ miyrimli ekenligin ko’rsetip turadi. Qopal, ashiwshaq yamasa ku’nshil adamnin’ ko’zleri de olardin’ qanday adam ekenligin da’llileydi. Ne ushin adamnin’ ju’zine qarap bizler onin’ qanday ekenligin aytiwimiz mu’mkin? Sebebi ko’binese adamnin’ ju’zi onin’ barlig’in, ishki du’nyasin, minez xulqin su’wretleydi.

Bazi adamlardin’ ju’zine qarap olarg’a so’ylewge ha’tteki jaqinlasiwg’a da qorqasiz. Jilli ju’zli adam menen ha’zetip so’ylesiw mu’mkin. Solay emes pe? Ne ushin adamlar qopal, ashiwshaq, menmen boliwdi yamasa usilay ko’riniwdi qa’leydi? Minezdin’ bul sipatlari adamg’a payda keltirgen beken? Hasla yaq! U’yimizdin’ qasinda bir neshe dukanlar bar. Bazi dukanlarda jaqsi, mu’layim satiwshilar isleydi, geybirewlerinde bolsa qopal, ashiwshaq satiwshilar isleydi. Sizdin’ pikirin’izshe, qaysi dukang’a adamlar ko’birek kiredi? A’lbette jaqsi personal isleytug’in duking’a kiredi.

Geybir adamlar kishkene lawazimg’a iye bolsa da, o’zlerin patshalarday etip tutadi. Puli ko’p adam da usi siyaqli jol tutadi. Biraq olar bir ku’n kelip awir awxalg’a yamasa barliq pullarinan ayirilip qaliwi da mu’mkinligin bilmeydi ha’m oylamaydi. Quday barliq adamlardin’ sirtqi ko’rinisine emes, ju’regine qarag’aninday bizler de ila’ji barinsha sonday etip qarawg’a intiliwimiz kerek. Muxaddes Kitapta Quday menmenlerge qarsi, biraq kishipeyillerge miyrim-sha’pa’a’tli dep jazg’an edi.

Bazi adamlar o’zlerin menmen yamasa basqalarg’a mensinbey qarim qatnas qilsa, ha’mme olardi hu’rmet etedi yamasa qorqadi dep oylaydi. Biraq olar qatti adasadi. Bul olardin’ ta’rbiyasizlig’i, ma’deniyatsizlig’inan derek beredi. Muxaddes Kitapta Quday bizlerdi O’zinin’ su’wretine qarap jaratqanlig’i haqqinda jazilg’an. Bizler qopal qarim-qatnasta bolsaq, basqalardi hu’rmet etpesek a’lbette Qudaydi alg’izlay almaymiz, kerisinshe, Og’an so’z tiygizip, u’yaltiramiz.

Jaratilis kitabi birinshi babi 31 ayatinda bilay jazilg’an: “Quday barliq jaratqanlarina qarap, olardin’ ha’mmesinin’ de ju’da’ jaqsi ekenin ko’rdi”. Biraq Quday bizlerdi O’zine uqsatip jaratqanin umitpawimiz lazim. Bul bizlerdin’ basqa barliq jaratilislardan pariq qilatug’inimizdi bildiredi. Insan bul ulli at. Doslar, kelin’, usi atqa ilayqli jasaymiz. Menmenligimizdi bir jerge isirip jiberip kishipeyil bolamiz.

“Bul du’nyadag’i bay adamlarg’a menmen bolmawdi ha’m o’tkinshi bayliqtan u’mit etpewdi buyir. Al olar ra’ha’t ko’riwimiz ushin bizlerge ha’mme na’rseni mol-mol etip beretug’in Qudaydan u’mit etsin. Olarg’a jaqsiliq islewdi, jaqsi isler menen bay boliwdi ha’m o’zinde barin basqalar menen bo’lisip, saqiy boliwdi da tapsir. Sonda olar haqiyqiy o’mirge iye boliwi ushin, o’zlerine keleshekte bekkem tayanish bolatug’in g’a’ziyne toplaydi” 1 Timofey 6. Doslar, usi tilekler menen bu’gingi esittiriwimizdi juwmaqlaymiz. Mag’an ajiratilg’an waqit o’z juwmag’ina jetip, sizler menen ha’zirshe xoshlasaman. Xosh saw aman bolin’.

.