Assalawma a’leykum hu’rmetli esittiriwimiz iqlasbentleri. Sizler menen Danaliq radiosinda ushrasip turg’animizdan sheksiz minnetdarmiz. Bu’gingi esittiriwimiz ha’mmemizge tanis bolg’an “kinolar” haqqinda boladi. Sizler menen mikrofon aldinda Sarbinaz.

Ha’zirgi zamana’go’y da’wirde ha’r bir shan’araqta televizor, internet ha’m radiolar bar. Doslar, sizlerdin’ pikirin’iz she, olardin’ adamlar ushin a’hmiyeti qanday? Kelin’, sizler menen televizor ha’m radiolardin’ jaqsi ha’m jaman ta’repleri haqqinda sa’wbetlesip, pikirlesemiz. Ha’zirgi ku’ni televizor arqali ha’r qiyli seriyallar ko’rsetilip atir. Usi seriyallar baslandi degennen barliq islerimizdi qoyip turip, ko’riwge asig’amiz. Bul filmlerdi ko’rgen sayimiz bizlerdi o’zine qatti baylaydi. Qiziq, olar ne arqali bizlerge sonshelli jaqin bolip, bizlerdi o’zine tartip turadi? Ba’lkim kinodag’i qaharmanlarmeken? Yamasa sonshelli professional da’rejede tu’sirilgenbeken? Men bir hayaldan usi haqqinda sorag’animda, ol hayal sol serialdag’i bir-birin jaqsi ko’rgen adamlarg’a ha’wes etetug’inlig’in aytqan edi.

Bul seriallar balalarimizdin’ ta’rbiyasina qanday ta’sir etediken degen oyda ha’r birewimizde payda bolmay turmaydi. Qansha shan’araqlardin’ buzilip ketiwi mna jaqta tursin, birewdin’ hayalin basqa adam jaqsi ko’rip qaliwi ha’m olar o’zlerinin’ shan’araqlarin basqa shan’araqqa almastirip, taslap ketiwi. Bulardin’ ha’mmesi balalarimizg’a qanday ta’sir o’tkizip atir eken. Yamasa a’lleqashan o’z ta’sirin o’tkizip boldimeken?

Ko’pshilik aytiwi mu’mkin, awa, duris, balalarimizg’a seriyalar ko’riwine ruxsat bermewimiz kerek dep. Biraq olar mektepte, ko’shede doslarinan serial haqqinda esitedi, usinday waqitta olardin’ aldin qalay alsaq boladi. Sebebi a’piwayi reklamalar arqali ko’rsetilip atirg’an ha’r qiyli ma’nissiz momentlerdi qalay toqtata alas boladi? Yag’niy bul seriyaldin’ jaman ha’m uyatli ta’replerin alip qarayiq.

Kelin’, endi jaqsi ta’replerin de ko’rip shig’ayiq. Misali men “Qish sonatasi” seriyaldi ko’rdim ha’m ol serildan ko’p jaqsi na’rselerdi u’yrendim dep aytiwim mu’mkin. Misali, basqa adamlar menen qalay so’ylesiw kerekligi, kiyiniw ma’deniyati, shan’araq ag’zalarimiz, hayalimiz yamasa ku’yewimiz benen qanday qarim-qatnasta boliw kerekligin ha’m budan tisqari ko’plegen men onshelli itibar bermegen na’rseler haqqinda.

Biraq usi seriladin’ dawaminda men onin’ waqitimdi urlap atirg’anin sezdim. Sonin’ ushin ha’r bir televizor arqali ko’rsetip atirg’an kinolar, ko’rsetiwler ushin bizlerde qanday da shegera boliwi kerek ha’m ha’r bir adam neni ko’riw kerek, neni ko’rmew kerekligin biliwi lazim dep oylayman.

Doslar, uliwma televizor ko’rmen’ler demekshi emespiz. O’ytkeni, olar ku’ndelikli o’mirimizde paydalaniw ushin a’hmiyetli. Du’nyada bolip atirg’an jan’aliqlardi esitemiz, ko’remiz. Sonin’ ushin hu’rmetli tin’lawshilar, neni ko’rmekshi bolsaqta, itibarli bolip duris ha’m jaqsi paydali bolatug’in na’rselerdi ko’riwge ha’reket eteyik. O’ytkeni, ha’r bir ko’rip atirg’an kinolar, da’sturler de qandayda bir ta’sir o’tiretug’unin yadimizdan shig’armayiq. Jaratqan Iyemizdan ha’r bir qilip atirg’an islerimizde danaliq beriwin sorayiq, sebebi Ol bizlerdin’ basqariwshimiz ha’m jol ko’rsetiwshimiz. Usinin’ menen qa’dirli doslar, sizlerge jaqsi ku’n tilep, ha’zirshe xoshlasamiz. Xosh-saw salamat bolin’.