Assalawma a’leykum hu’rmetli tin’lawshi doslar. Ja’ne siz benen radio arqali diydar ushrasip turg’animizdan quwanishlimiz. Hu’rmetli tin’lawshilar, bu’gingi esittiriwimiz, ruwxiy o’mirimizdi rawajlandiriwg’a bag’ishlanadi. Ha’zirgi ku’ni ruwxiy o’mirimizdi rawajlandiriwimiz ushin ko’plegen qollanbalar bar. Qa’lesen’iz doslarin’iz benen, yamasa sabaqliqlar arqali shug’illansan’iz boladi. En’ a’hmiyetlisi Iysa Masiyxti ju’regimizge qabil etkenimizden son’, bir jerde turip qalmayiq. A’lbette Qudaydan bizlerdi ruwxiy o’stiriwin ibadatlarimiz arqali sorayiq.

Sizge ma’n’gilik o’mirdi sawg’a etip bergen Quday, a’lbette ruwxiy o’siwin’iz ushin da g’amxorliq etedi. Doslar, sizlerge bir a’jayip ma’slaha’tti beriwdi o’zimizge lazim dep taptiq. Ruwxiy o’siwdin’ en’ na’tiyjeli usili bul kimgedir sha’kirt boliw eken. Sebebi Iyemiz Iysa Masiyx da jer ju’zindegi tiykarg’i waqitin sha’kirt tayarlawg’a ha’m olardin’ ruwxiy o’siwleri ushin bag’ishlag’an. Siz tan’lag’an ustazin’izdin’ tiykarg’i ma’qseti de tap usinday boliwi kerek dep oylaymiz. Sizler ruwxiy o’skenin’izden son’ o’zin’iz de tap sonday jol tutip sha’kirt tayarlawin’iz mu’mkin. Bul Iyemiz Iysa Masiyxtin’ su’ygen usillarinin’ biri desek qa’te bolmaydi.

Elshi Pavel o’zinin’ so’zlerinde bilay degen edi: “Onda tamir jayip ha’m tiklenip, o’zlerin’iz u’yrengendey, isenimde bekkemlenip barin’lar ha’m Qudayg’a sansiz shu’kirlik bildirin’ler”. Hu’rmetli tuwisqanlar, siz barliq u’yrengenlerin’izdi Iyemizdin’ ja’nede ullilaniwi ushin isletin’. U’yrengen barliq na’rselerin’izdi ja’nede rawajlantirip barin’, sonda isenimin’iz bekkem boladi. Ruwxiy o’siwde bir neshe ma’qsetlerdi aldin’izg’a qoyin’. Misali: Iyemizge xizmet etiwin’izde o’z isenimin’izdi bekkemlew. Muxaddes Kitapti teren’irek u’yrenip ayatlardi yad aliwg’a ha’reket etin’., Quday menen jaqsi ha’m jaqin qarim-qatnasta bolip, ha’r ku’ni ibadat etiwdi aldin’izg’a ma’qset etip qoyin’.

Bulardan tisqari Aspan patshalig’i ha’m Qudaydin’ so’zin basqalarg’a aytiwdi da en’ a’hmiyetli ma’qsetlerin’iz etip qoyin’. Quday ha’r sapari sizge qanday da jan’a na’rselerdi u’yretkeninde ha’mme waqit Og’an o’z ibadatlarin’iz arqali minnetdarshiliq bildirin’. Ha’r qanday jag’dayda da isenimde bekkem tura aliwin’iz ushin Qudaydan sizge ku’sh beriwin sorap turin’.

Hu’rmetli radio tin’lawshi dostimiz, siz doslarin’iz ushin ha’mme waqit duwada bolin’. Quday ha’r birewimizdi ruwxiy o’stiriwi ushin isenimde bekkem boliwimiz ushin bul bizlerdin’ birinshi qa’demimiz bolsin. Keyingi esittiriwlerimizge shekem sizler menen ha’zirshe xoshlasamiz.