Assalawma a’leykum qa’dirli radiomiz iqlasbentleri. “A’lbette, men oni keshiremen, biraq aldin ol kelip mennen keshirim sorawi kerek. Ne ushin endi men birinshi bolip keshirim sorawim kerek?” – deydi bir hayal. Erkek adam bolsa: “Men jan dep keshirim sorag’an bolar edim, biraq onin’ aldina bariwg’a batina almay atirman”, – deydi. Usi waqitqa shekem bizler keshirim beriwdi qapa bolg’an adamnin’ ta’repinen ko’rip shiqtiq. Eger jaqsi mu’na’sa’betlerdi qaytaldan/bastan toliq tiklemekshi bolsaq, keshirim beriw bul ele istin’ yarimi ekenligin umitpawimiz kerek. Is aqirina jetiwi ushin qapa qilg’an adam ta’wbe etiwi kerek boladi. Keshirim menen ta’wbe birgelikte jarasiwg’a alip keledi. Keshiriw bul:

Qapashiliqti shin kewilden keshiriw;

Keltirgen ziyani ushin ornina hesh na’rse talap etpew;

Qapashiliqti pu’tkilley umitiw degen eken.

Ta’wbe etiw bul:

Keshirim soraw;

Keltirgen ziyan ornin qaplaw;

Budan son’ o’zin ayipdar ha’m u’yatli etip sezbew.

Ta’wbe etiw de geyde tap keshirim beriwge uqsap qiyin o’tedi. Ta’wbe etiw sezimlerdi tinishlantiradi. Ayipdarliq ha’m u’yat sezimi tap o’sh aliw ha’m jek ko’riw siyaqli ishin’di ku’ydiredi. Geybir adamlar ayiplarin jasiradi ha’m o’zlerin ayipsiz etip ko’rsetedi. Basqalar bolsa, kerisinshe, ayibin bo’rttirip jiberedi ha’m min’ pushayman jep, qiynaladi. Ta’wbe etiw qapa bolg’an adamnin’ sezimlerin tu’siniw demek.

Bolip o’tken waqiyani ha’r qiyli adamlar ha’r tu’rli etip qabil etedi. Ta’wbe etiw basqa adamg’a qarata hu’rmet ha’m su’yispenshilikti talap etedi. “Nege ol ha’zildi tu’sinbey me?”, “Ne ushin ol arzimag’an na’rse ushin sonshelli ku’yip pisedi?” – degen so’zler menen o’zlerinin’ ayibin usi tu’rde a’hmiyetsiz yamasa ha’zildey etip ko’rsetiwge uring’ani jabirlaniwshini kemsitedi. Ba’lkim hesh na’rseni jasirmay: “su’yiklim, men shini menen sennen keshirim sorawim kerek. Men sennen gumanlandim. Sennen orinsiz gumansirag’animdi ha’zir tu’sindim. Qizg’ang’anim ushin meni keshir, iltimas”, dep ta’n alg’an maqul dep oylaymiz. Geyde adam keshirim soraw tu’rinde o’zinin’ g’a’zebin ha’m kritikasin u’lken uqipliliq penen aytip aliwi da mu’mkin. Biraq bul usildin’ o’zine jarasa qa’wipli ta’repleri bar. Ta’wbe etip atirg’an waqitta, qay da’rejede ashiq boliwi sharayitqa baylanisli, degen ta’rtipke a’mel etiw kerek.

Awir ha’m qopal sezimlerdi sirtqa shig’armawg’a ha’reket etiw kerek. Misali ushin, uriliqqa uqsas gey bir isler ko’p jag’daylarda ayipsiz adamlardi gu’mang’a saladi ha’m bunday waqitta adalatti ju’zege shig’ariw ushin ashig’ina so’ylesiw lazim. Ayibin’izdi ta’n aliwdan aldin, siz ta’rezinin’ bir jag’ina ayipdarliq seziminen qutilatug’in jen’illikti, ekinshi ta’repine jaqinlarin’izg’a qiyinshiliq tuwdiriwin’iz mu’mkin bolg’an azaplardi ko’z aldin’izg’a keltirip ko’rin’, son’ bir sheshimge kelin’. Adam a’wmetsizlikti ha’m qilg’an qa’telerin qa’legen waqitinda Qudaydin’ aldinda ta’n aliwi mu’mkin. En’ jaqsisi, ta’wbe etiwdi duwa etiwden baslag’an maqul. Bizler na’zik izzet-hu’rmetimizdi bir shetke qoyip turip, “… su’yiwshi ha’m miyrim-sha’pa’a’tli, Ju’da uzaq sabirli ha’m keshirimli, Ayiplarimizg’a qarap bizlerge qarim-qatnasta bolmaytug’in, gu’nalarimizg’a jarasa bizlerge juwap bermeytug’in” Qudaydin’ aldina keliwimiz kerek. Quday menen jarasip alg’annan son’, Onin’ ja’rdemine su’yenin’. Jaratqannin’ sizge basqalar menen jarasip aliwin’iz ushin en’ danali joldi ko’rsetedi.