Assalawma a’leykum hu’rmetli tuwisqanlar sizler menen efir arqali ushrasip turg’animizdan quwanishlimiz. Jaqsi insandi qalay ajiratiw mu’mkin? Bu’gin Quday bizlerge usi haqqinda ne degenin u’yrenemiz. Ol bizlerge bulardi O’zinin’ Muxaddes So’zi arqali aytadi. Kelin’, Muxaddes Kitabimizdin’ Matta kitabinin’ 7 babin oqiwdi dawam etemiz. “En’ aldi menen Qudaydin’ Patshalig’in ha’m Onin’ haqlig’in izlen’ler! Erten’gi ku’n tuwrali ta’shwishlenben’ler! Sebebi erten’gi ku’n o’zi ushin o’zi g’am jeydi. Ha’r ku’nnin’ o’z g’ami o’zine jetedi.

Basqalardi hu’kim etpen’ler “Basqalardi hu’kim etpen’ler, sonda sizler de hu’kim etilmeysiz. O’ytkeni sizler basqalardi qanday hu’kim etsen’ler, o’zlerin’iz de sonday hu’kim etilesizler. Qanday o’lshem menen o’lshep bersen’ler, o’zlerin’izge de sonday o’lshem menen o’lshep beriledi.

Sen nege tuwisqanin’nin’ ko’zindegi sho’pti ko’rip turip, o’z ko’zin’degi qadani sezbeysen’? O’z ko’zin’de qada bola tura, qalay: “Qa’ne, ko’zin’degi sho’pti alip taslayin”, – dep tuwisqanin’a aytasan’? Ha’y, eki ju’zli! Da’slep o’z ko’zin’degi qadani alip tasla, sonda aniq ko’rip, tuwisqanin’nin’ ko’zindegi sho’pti alip taslay alasan’.

Muxaddes zatti iytlerge bermen’ler. Hinji-marjanlarin’izdi shoshqalardin’ aldina taslaman’lar. Olar hinjilerin’izdi ayaqlari menen basqilap, aylanip kelip o’zlerin’izdi tilkimlep taslaydi.”

Qudaydan soran’lar “Sizlerge beriledi. Izlen’ler, tabasizlar. Esikti qag’in’lar, ol sizlerge ashiladi. O’ytkeni sorag’an ha’r bir adam aladi, izlegen tabadi, esik qaqqang’a ashiladi. Sizlerdin’ aran’izda uli nan sorasa, tas beretug’in adam bar ma? Ya bolmasa, baliq sorasa, og’an jilan beretug’in bar ma? O’zlerin’iz jaman bola tura, balalarin’izg’a jaqsi siylar beriwdi bilsen’iz, onda aspandag’i A’ken’iz O’zinen sorag’anlarg’a qanshelli ko’p iygilikler beredi!

Solay etip, ha’mme iste adamlardin’ o’zlerin’izge ne islewin qa’lesen’ler, sizler de olarg’a soni islen’ler. Muxaddes Nizamnin’ da, payg’ambarlardin’ Jaziwlarinin’ da ma’nisi usi.

Tar qapidan kirin’ler “Tar qapidan kirin’ler. O’ytkeni nabit boliwg’a aparatug’in qapi ken’, jol da enli, onin’ menen ju’retug’inlar ko’p. Al o’mirge aparatug’in qapi tar, jol da ensiz, oni tabatug’inlar az.

Terek miywesinen biliner “Jalg’an payg’ambarlardan saq bolin’lar! Olar qoy terisin jamilip sizlerge keledi, biraq ishlerinde olar jirtqish qasqirlar. Sizler olardi miywesinen bilesizler. Shen’gelden ju’zim yamasa oshag’annan a’njir jiynay alasiz ba? Ha’r bir jaqsi terek jaqsi miywe beredi, jaman terek jaman miywe beredi. Jaqsi terek jaman miywe bere almaydi, jaman terek jaqsi miywe bere almaydi.