Assalawma a’leykum qa’dirli doslar. Kimgedir qapa bosaq, biraq ol bizlerden keshirim soramasa, aniqrag’i keshire almasaq, tap kimgedir qariz pul berip, endi pulimizdi qaytip ala almayatirg’an adamg’a uqsap ashiwlanamiz. Bunday waqitta qarizdar adam qarizin qaytara almasa, min’ ashiwlanip, g’a’zepleniwdin’ paydasi joq. Eger siz ushin keshiriw qiyin bolsa, onda ayipdar adamda jag’daydi o’zgerte almaydi. Doslar, ha’r sapari da joytilg’an na’rse ushin toliq shig’in to’lewdin’ imkani bola bermeytug’inin umitpawimiz kerek eken. Misali, jog’altqan qizin’iz yamasa balan’izdin’ ornin ne toltira alar edi? Qilajaq bolg’an jamanlig’in’iz o’zin’izge qaytip kelgen shermendelikti qalay juwa alasiz? Hesh na’rse menen emes! Ja’bir ko’rgen adam ushin jalg’iz joli, o’mirin dawam ettiriwi ushin jog’altiwg’a ko’nigiw, ha’m jan’a o’mir baslap jasawg’a ha’reket etiwi dep oylaymiz. Usinin’ menen bizler aramizda hesh kim minsiz ha’m kemshiliksiz emes ekenine isendik. Bizler Qudaydi ha’mme waqit renjitemiz.

Demek, Onin’ aldinda qarizdarmiz ha’m keshirim sorawdan basqa jolimiz joq. Doslar, Qudaydin’ miyrim-sha’pa’a’tinin’ shegarasi joq. Keshirim sorasaq, Ol keshiredi. Onin’ su’yispenshiligi menen atanaq ag’ashta qarizlarimiz ushin to’lem to’lengen. Biraq, o’zlerimizdin’ is-ha’reketlerimiz benen Qudaydin’ su’yispenshiligine erise almaymiz. Bul bizlerdin’ hesh qashan qolimizdan kelmeydi. Quday bizlerdi qanday bolsaq, sondaylig’imizsha su’yedi. Biraq Onin’ su’yispenshiligi jolinda etilgen islerimiz sinawg’a uqsaydi. Bul sinaw arqali Quday su’yispenshiligin haqiyqattan ha’m tu’sine alamiz ba, qilg’an gu’nalarimiz ushin ju’rekten ta’wbe etip atirmiz ba ya joq pa, aniq bilip alamiz. Masiyx bul haqqinda bilay deydi: Quday qayirqomliq penen millionlap adamlardin’ gu’nalarin keshirdi. Eger Onin’ gu’nalarimiz ushin to’legen qurbanlig’ina gumansiramay isensek, bar-jog’i ju’z adamdi keshirmewge haqqimiz joq eken.

“Bizlerge qarsi gu’na islegenlerdi bizler keshirgenimizdey, Sen de bizlerdin’ gu’nalarimizdi keshire go’r”. Bul Iyemizdin’ sha’kirtlerine u’yretken ibadatinin’ so’zleri. Bizlerdi keshiriwshi Quday basqalardi da keshiriwimizdi qa’leydi. Solay etip, bizler keshiriwimiz kerek bolg’an eki sebepti aniqlap aldiq: qapashiliq bizlerge ziyan keltiredi ha’m keshirmeytug’in ju’rek Qudaydi renjitedi.

Kelin’, endi iymanlilardin’ keshiriw ushin etetug’in islerin qa’dem be-qa’dem ko’rip shig’amiz. Keshirim beriw ushin bizler birinshi orinda kewlimizdegi qapashilig’imizdi tu’sinip ishki sezimlerimizdi jasirmawimiz kerek. Saw pikirlewshi adam ha’r qanday adamdi qapa etip qoyg’aninda, onin’ g’a’zepleniwi ta’biyiy. G’a’zep uliwma bir-birine uqsamaytug’in eki tu’rli ko’riniste boliwi mu’mkin.

Bizler qatti ashiwlanip, jawiz bolip qalamiz, awizimizdan bolmaytug’in jaman so’zler, na’letler shig’a baslaydi, ha’r na’rseden ayip izley beremiz, ha’tteki qorqitiwg’a shekem baramiz. Eger odan da g’a’zeplenip ketsek, jer tebip, aldimizg’a shiqqan ha’mme na’rseni ura baslaymiz. Qopal ha’m hesh kim menen qatnaspaytug’in bolip ta qalamiz. Bergen na’rselerimizdi qaytip alamiz. O’z is-ha’reketlerimiz arqali bul adamg’a basqa qaytip isenbeytug’inimizdi ko’rsetemiz. Indemey, so’ylespey ju’riw ja’njel yamasa baqir-shaqirlarg’a qarag’anda kemirek qorqinish a’keledi dep bolmaydi eken. Ko’binese, geybirewler, baqir-shaqir menen: “Men baqirip atirg’anim joq!” – dese, buni ko’rip ku’lgimiz keledi. Qa’dirli doslar, sizlerge g’a’zep, o’sh aliw ha’m qapashiliqtan o’zlerin’izdi abaylan’lar dep bu’gingi efirimizdi ha’zirshe juwmaqlaymiz.