Assawlama a’leykum hu’rmetli doslar. “Miyman atan’nan ulli” deydi miymanshil xalqimiz. Ha’zirgi ku’ni miyman ku’tiw ha’m u’y iyesinin’ o’zin tutiwi haqqinda ko’p aytilip atir. Biraq bizler biraz a’detimizge o’zgeris kiritip, miymanlardin’ a’depi haqqinda so’ylesiwge qarar ettik. Miymang’a bariw ha’m miyman ku’tiw a’depleri haqqinda ko’p na’rseler jazilg’anin oqisaq boladi. Bilayinsha alip qarag’animizda bul bizlerge mashqala emestey bolip ko’rinedi. Sebebi bizler u’yimizge kirip kelgen ha’r qanday adamdi ju’da hu’rmetleymiz, to’rimizge otirg’izamiz. Qonaq ku’tiw bizler ushin qiyin emes! Biraq usi orinda minez-xulqimizdag’i ja’ne bir elementti esapqa aliwimiz kerek: bul – bizler shidaymiz! Duris, miyman o’zin tutiwi, ga’p-so’zleri, uliwma u’yimizge kelgeninin’ o’zi geyde unamawi mu’mkin, biraq qarsiliq ko’rsetpeymiz, esikti ko’rsetpeymiz. Sebebi ol miyman!

Biraq sol “atamizdan ulli” miymang’a ja’ne qansha shidaymiz? Hayran bolman’, ba’lkim miyman sawdasi sizlerdin’ basin’izg’a tu’spegen shig’ar, biraq bizlerdin’ u’yimiz, esimdi bilgenimnen beri miymaxana! Ata-anamnin’ ne ushin bunday miymandos ha’m shidamli ekenin tu’sine almayman. “Bul qaytama jaqsi-g’o. Jaqsi adamnin’ u’yine adam keledi, dep atirg’an shig’arsiz? Biraq sol jaqsi adam miymandosliqtan qansha qiyinshiliq ko’retug’inin bilesiz be? Kelgen hayallardin’ minez-xuliqlari, pisent etpewi, bolar-bolmas ga’plerdi so’ylewi, erkeklerdin’ iship alip azang’a shekem qaytarip shig’iwi, qaysi miymandosliq kitabinda jazilg’an? Menin’ oyimsha, miyman bolip baratirg’an adam geybir nizamlarg’a a’mel qiliwi kerek. Buni ha’tteki nizamg’a da kirgiziw kerek dep oylaymiz. Bolmasa miymados, shin kewilli adamlar ja’bir ko’rip ju’re beredi. Bir dostim miyman ku’tiwde ha’m miymang’a bariwda ta’jiriybesi u’lken bolg’ani ushin zamana’go’y miyman qanday boliwi haqqinda nizamlardi islep shiqqan.

Shaqirg’anda bariw. A’welem bar, aytilg’an jerge bariw – qariz esaplanadi. Sizdi jaqin tutip, hu’rmetlep, sizdi shin kewilden sa’wbetlesiw ushin u’yine shaqirg’an bolsa, a’lbette barin’. Ta’biyiy jag’day ha’m a’detke aylanip baratirg’an “bizler betke de barin’”, “U’yge kelin’”, dep kewil ushin aytip shaqirg’ang’a isenip, olarg’a ha’mme waqit bariwg’a asiqpan’, biraq qanday da bir sebep penen, aniq waqitin aytip, aniq ga’p penen mira’t etse, qaytarman’. Ba’lkim ol adamnin’ endi imka’niyati ha’m waqiti bolg’an shig’ar, yamasa ha’zirshe jag’dayi joq shig’ar.

Aytip bariw. Hesh qashan ku’tilmegen miyman bolman’. Jaqin adamin’izdin’ u’yine baratirg’anin’izdi a’lbette aldin ala aytin’. Geybirewler aytip barsam, a’were qilip qoyaman, miyman ku’tiwge tayarlanadi, dep o’zin aqlaydi. Yaq! Bul naduris, ba’lkim u’yi miyman ku’tiwge tayar emes shig’ar.
Ha’zir ko’pshilik shan’araqlardan hayallar da jumiz penen a’were, azanda erte shig’ip ketip, keshete kelip keshki awqatqa qaraydi, u’ylerin son’ jiynastiradi. Siz bolsa tu’sten o’tip barsan’iz, u’ydin’ iyesin qolaysiz jag’dayg’a salip qoyiwin’iz mu’mkin. Ba’lkim sol ku’ni jaqsi ko’p awqat pisirmey atirg’an boliwi da mu’mkin. Sizdin’ keliwin’izdi bilip basqa awqatqa o’zgerttiredi. Pul ketiredi, biraq naqulay jag’daydan shig’ip ketedi. Sebebi u’yatqa qaliw bizlerdin’ mentalitetimizde puldin’ ketkeninen de jamaniraq!

Qisinbaw. “O’zin’izdin’ u’yin’izde ju’re berin’” degen ga’p hesh qabil etilmeydi. Siz qansha ko’p u’yalsan’iz u’ydin’ iyesi sonshama a’were boladi. Kewlin’izdi aliw ushin, unaytug’in isti qiliw ushin ko’p ha’reket etedi. Tilekke qarsi waqitimiz sheklengen, doslar 21 a’sir miymani haqqinda keying esittiriwimizde dawam etemiz.