Assalawma a’leykum doslar. Muxaddes Kitapti oqisan’iz, Yuxan 15 babinda Iysani satip qolg’a uslatip bergen ha’m atanaq ag’ashqa shegelengen ku’ni, bag’din’ ishinde ketip baratirip, sha’kirtlerine aqirg’i a’jayip so’zlerin aytqan edi. Esin’izde me sol waqitta Iysa qolina ne uslap turg’an edi? Ol pul emes, xat emes, al ju’zimnin’ ag’ashin uslap turg’an edi. Ol oni uslap turip, sha’kirtlerine ha’m sol menen birge bizlerge de o’mirde tuwri jasawimiz ushin a’hmiyetli na’rseni aytqan edi. Kelin’, sizlerge Yuxan 15 babin oqip beremen: “Men – haqiyqiy ju’zim ag’ashiman, al A’kem bag’man. Mendegi jemis bermeytug’in ha’r bir shaqani Ol kesip taslaydi. Jemis beretug’in ha’r bir shaqani ja’ne de ko’birek jemis bersin dep, putap tazalaydi… Men – ju’zim ag’ashiman, sizler – shaqalarsiz. Kim Mende bolip, Men onda bolsam, ol ko’p jemis beredi. Sebebi Mensiz hesh na’rse isley almaysizlar. Kim de kim Mende bolmasa, shaqa siyaqli sirtqa taslanip, quwrap qaladi.

Bunday shaqalar jiynalip, otqa taslanip jandiriladi. Eger sizler Mende bolip, Menin’ so’zlerim sizlerde bolsa, qa’legenin’izdi soran’lar, sizlerge beriledi. Sizler ko’p jemis bersen’ler, A’kem ullilanadi. Sonda Menin’ sha’kirtlerim bolasizlar” (Yuxan 15 bap). Qa’dirli doslar, sizlerge aytajag’imiz, Iysa – shini menen ju’zim ag’ashi. Ha’r ta’repke ken’ jayilg’an shaqalar, ha’m shaqalarg’a, son’ miywelerine ku’sh ha’m jeterli aziq-awat beretug’in qalin, bekkem ju’zim ag’ashi. Quday bolsa – bag’man. Bag’man sol ju’zim ag’ashinin’ iyesi. Onin’ ma’qseti – ko’p jemis aliw. Sizler menen men shaqalarimiz. Ju’zimzarliqta bilsen’iz bag’mannin’ diqqati shaqalarg’a qaratilg’an boladi, sebebi olar miywe beredi. Bag’man bolsa olar ushin ko’p miynet etedi. Olardag’i kereksiz ha’m jemis bermeytug’in shaqalarin kesip taslaydi. Olardi abaylap ga’mxorliq etedi. Olarg’a kereginshe quyash nurin tu’sirip, suwg’aradi ha’m qaraydi. Doslar, sizlerge bir soraw bersem: Ne ushin Iysa ju’zim ag’ashi ha’m onin’ shaqalari haqqinda aytiwdi o’liminen aldin’g’i tu’ndi sayladi? Sebebi ol sha’kirtleri ju’zim ag’ashi menen shaqalarina basqa ta’repten yag’niy Qudaydin’ ko’z qarasi menen qarawdi qa’legen. Bul ju’da ah’miyetli.

Doslar, esin’izde bolsa, o’letug’in adamnin’ so’zleri ha’m oni esitken adamnin’ jag’dayin misal etip aytip bergen edik. O’leyin dep atirg’an adam aqirg’i a’hmiyetli bolg’an so’zlerin aytadi. Oni tin’lag’an adam ha’m aytqanlarin o’mirinin’ aqirina shekem umitpaydi. Iysa da sha’kirtlerinin’ ju’zim ag’ashi menen bag’man haqqinda jaqsilap eslep qaliwin qa’legen. Quday menin’ o’mirimde neler qilajaq? Ne ushin bular men qa’legen na’rseler emes? Usinday sorawlar berip, ko’p waqit bul jazilg’an bapti oqig’animda shaqalar beretug’in jemis bul qutqariliw tapqan janlar, dep oyladim. Endi sizlerge Muxaddes Kitaptan usig’an juwap bola alatug’in ja’ne bir ayati oqip berseem: “Qudayg’a isengenlerdin’ o’zlerin jaqsi islerdi islewge arnawg’a tirisiwlari kerek…” (Titus 3:8). Sol tu’ni ha’m ha’zirge shekem Qudaydin’ bizlerden qa’legen na’rsesi bul – Onin’ miynetlerine jarasa jemis beriwimiz eken. Ol bizlerden usini ku’tedi. Doslar, sizde jemistin’ belgileri ko’rine me?