Assalawma a’leykum qa’dirli doslar. Sizler menen ja’ne efir arqali ushrasip turg’animizdan quwanishlimiz. Insan kewli ha’m pikirleri ju’da qiyin na’rseler. Ol geyde biykarg’a qa’weterlenip atirg’ang’a uqsaydi. Qa’weterler, qorqiwlar adamnin’ ju’regin kemiredi. Miyin qaran’g’iliqta qaldirip, duris pikirlewge shalg’itadi. Qa’weterleniw bizlerge jaqsiliq a’kelmeydi. Usinday waqitlari ne qiliwimiz kerek? Qa’weterlerdi qalay jen’iwimiz mu’mkin? Degen sorawlar payda boladi. Bul sorawlarg’a bir neshe qa’demler menen juwap beriwge ha’reket etemiz:
1. Qa’weterlengende Qudaydin’ aldina keliw kerek. Sardar basi Yayir kelgendey, yamasa qizi kesel bolg’an Samariyali hayal kibi Og’an keliwimiz lazim. Qa’weterler bizlerdi ha’r ta’repleme qorshap, ju’regimizdi iyelep alg’anda, olarg’a itibar qaratsaq yamasa ma’selege o’z pikirlerimiz boyinsha qarasaq a’lbette qa’weterler ishinde jog’alip qaliwimiz ta’biyiy. Biraq bul ma’selelerdi Iysanin’ aldina alip barsaq, Ol bizlerge ta’shwishlerimizge qalay qarawdi ha’m olardi qalay sheshiw kerekligin u’yretedi.
2. Ekinshi qa’dem – duwa etiw. Bolajaq ma’sele ushin qa’weterlenip ta’shwishlengennen go’re yamasa bolip o’tken waqiya ushin jilap otiriwdin’ ornina Qudayg’a duwa etiwimiz en’ duris jol. Kollektiv ag’zalari menen basliqti o’sek qilg’annan go’re basliq ushin ibadat etiw jaqsiraq. Muxaddes Kitap bizlerge bilay deydi: “Barliq g’am-ta’shwishlerin’izdi Og’an tapsirin’lar. O’ytkeni Ol sizlerge g’amxorliq qiladi” (1Petr 5:7). Doslar, qa’weter ha’m qorqiw bizlerdi baylap aliwina jol qoymayiq.
3. U’shinshi qa’dem, qa’weterler ha’m qorqiwdan u’stin keliw degeni. Qa’weterlerimizdi a’tirapta uship ju’rgen peshshelerdi quwg’animizday quwip jibereyik. Ko’z aldimizg’a keltirip ko’reyik, bizlerdin’ qanimizdi sorip shag’ip tursa, peshsheni ne qiliwdi uzaq oylap turmaymiz. Oni tez urip o’ltiremiz. Qa’weterler menen de usinday jol tutayiq.
Qorqiw ha’m ta’shwish bizlerdin’ qanimizdi sorip turg’aninda usinday shaqqanliq ha’m tezlik penen qarar qilayiq. Olar bizler menen jasawina uliwma jol qoymayiq. Qanday da bir kesellik ushin qa’weterlenip otirg’annan go’re shipakerge barip ko’rineyik, analizler tapsirayiq. Biraq en’ a’hmiyetlisi birinshi Qudaydin’ aldina barayiq. Qarizlarimdi endi qalay to’leymen dep qa’weterlenip otirg’annan go’re jumis islep, miynet eteyik. Baslig’im menin’ jumisim haqqinda qanday qararg’a keler eken dep, ta’shwishlenip, ish-ishimizdi jegennen go’re, aldina barip so’yleseyik. Qullas, ta’shwishler bizlerdi jen’iwine jol qoymayiq. Olar keliwinen aldin qarsi ha’reketlerdi a’melge asirip qoyayiq.
4. To’rtinshi qa’dem, bizlerdi ta’shwishlerge tu’siretug’in jag’daylar yamasa na’rseler dizimin jazip shig’ayiq. Bizlerdi neler ta’shwishlentiretug’inlig’in oylap ko’reyik. Olardi qa’lesek qag’azg’a jazayiq. Misali, bizlerdi son’g’i ma’rte neler qa’weterge salg’an edi.
5. Besinshi qa’dem bul bu’gin menen jasawimiz. “Erten’gi ku’n menen ta’shwishlenben’ler! Sebebi erten’gi ku’n o’zi ushin g’am jeydi. Ha’r ku’nnin’ o’z g’ami o’zine jetedi” (Matta 6:34). Qa’dirli doslar, kelin’, Muxaddes Kitap bizler ushin en’ jaqsi mayak bolip xizmet etetug’inin umitpayiq.
