Assalawma a’leykum doslar. Bu’gin sizler menen Ayan kitabin oqiwdi dawam ettiremiz. Esin’izde bolsa o’tken sapari Pergam ja’ma’a’ti haqqinda oqip u’yrengen edik. Ayan kitabinin’ 2 babi 23 ayati bilay deydi: “Onin’ izine ergenlerdi de o’limge duwshar etemen. Sonda pu’tkil ja’ma’a’tler Menin’ kewil ha’m ju’reklerdi sinawshi ekenimdi bilip aladi. Ha’r birin’izge islerin’izge qaray qaytaraman”.
Shini menen Qudayimiz kewil ha’m ju’reklerdi sinawshi Quday. Doslar, bilesiz be, Qudayimiz Ol ha’mme jerde tap ha’zir bola alatug’in, barliq na’rsege qadir, barliq na’rseni ko’retug’in Quday. “Hesh na’rseni ko’rmey turipti”, – dep oylaytug’inlar qatti adasadi. Quday ko’redi. “Hesh kim bilmeydi”, dep aytatug’inlar da adasadi. Quday biledi. Bir gu’na qilsaq, Quday bizlerdi da’rrew jazalamaydi. Ta’wbe etewimiz ushin waqit beredi.
Tiatira qalasinin’ ja’ma’a’tinde de usinday kemshiligi bar edi. Quday bul ja’ma’a’t haqqinda bilay deydi: “…Senin’ islerin’di, su’yispenshiligin’di, isenimin’di, xizmetin’di ha’m sabirlig’in’di bilemen. Son’g’i islerin’nin’ birinshi isengen waqtin’dag’i islerin’nen ko’birek ekenin de bilemen. Degen menen, sag’an bir qarsilig’im bar: Izabel atli hayalg’a shidap atirsan’. Bul hayal xizmetshilerimdi joldan urip, buziqshiliq islewge ha’m qurbanliq go’shin jewge u’yretpekte. Ta’wbe etiwi ushin og’an ma’wlet bergen edim. Biraq ol buziqshiliq ushin ta’wbe etiwdi qa’lemeydi. Mine, Men oni kesellik to’segine qulataman. Onin’ menen buziqshiliq isleytug’inlardi da onin’ menen birge islegen jaman isleri ushin ta’wbe etpese, u’lken qayg’i-ha’siretke duwshar etemen. Sonda pu’tkil ja’ma’a’tler Menin’ kewil ha’m ju’reklerdi sinawshi ekenimdi bilip aladi. Ha’r birin’izge islerin’izge qaray qaytaraman”.
Tiatirada qalg’an ha’m bul ta’limatlarinin’ izinen ermegenlerge ha’mmesine aytaman: sizlerge basqa awirliq salmayman. Tek g’ana Men Kelemen degenshe, o’zlerin’izde bar bolg’anlarg’a bekkem bolin’lar” (Ayan 2:19-25)
Eger diqqat penen tin’lag’an bolsan’iz, bul so’zler tuwri bizler ushin ha’m aytilg’an. Eger Tiatiradag’i ja’ma’a’tti bir jeke adam dep alsaq, onin’ ishinde jaqsi isler, sabirliq, su’yispenshilik, sadiqliq, iyman menen birge, jaman a’detler de bolg’an. Yag’niy buziqshiliq. Sol adamnin’ bul a’deti, basqalardin’ da buziliwina sebebshi bolg’an. Ishimizde iyman, isenim, su’yispenshilik, sabirliq, sadiqliq bolsa da bir g’ana gu’nali a’detimiz Qudaydin’ narazalig’ina sebebshi boladi.
Quday bizlerdin’ bul a’detimizdi ko’riwimizdi, ta’wbe etip, odan waz keshiwimizdi qa’leydi. Ol bizlerge ta’wbe qiliwimiz ushin waqit ha’m imka’n beredi. Eger onda da ta’wbe etpesek, onda Tiatira ja’ma’a’tindag’i hayal kibi bizlerdi de jazalaydi. Qa’dirli doslar, Quday kewilimizdin’, ju’reklerimizdin’ qanday ha’m oda neler bar ekenin bizlerden de jaqsiraq biledi. Eger shini menen Qudayg’a bolg’an su’yispenshiligimiz ku’shli bolsa, Qudaydin’ jolinda haq ju’rsek, qa’telerimizdi ta’n ala bilemiz. Olardan waz keshiw de qolimizdan keledi. Tiatira ja’ma’ati de basina jaman ku’nler tu’siwin qa’lemen. Bizler de buni qa’lemeymiz.
