Assalawma a’leykum hu’rmetli tin’lawshilar. Sizler menen ja’ne efir arqali ushrasip turg’animizdan minnetdarmiz.

Bizlerdi ko’binshe bir soraw oylantiradi. Ol da bolsa, men tapqan tabisimnan qansha bo’limin Quday ushin ajiratiwim kerek degen? Eger insan ta’repinen a’melge asirilip atirg’an bul xizmet tu’rin alip qaraytug’in bolsaq. Ha’r bir Quday degen insan o’zi islep tapqan tabisinan on protsentin ajiratadi. Misali, ju’z min’ somnan on min’in.

Endi usi jerde ja’ne bir soraw payda boladi. Usi on protsent puldi kimge beriwim kerek degen. Ayrim mu’ta’j adamlarg’a ma? Yamasa tek Quday ushin ba? A’lbette Quday ushin aylig’imizdan on protsentin ajiratiwimiz sha’rt.

Sebebi bul haqqinda Eski Kelisimde Malaxiya kitabinda aniq etip jazip qoyilg’an. Eger birew ushin ja’rdem bermekshi bolsan’iz a’lbette jaqsi is qilg’an bolasiz. Biraq bul ja’rdemdi shin ju’rekten o’z qaltan’izdan shig’ariwin’iz kerek boladi. Usi jerde Qudaydin’ puli menen birewge berejaq ja’rdem pulin’izdi adastirip jibermen’.

Bazi adamlar, eger men Quday ushin qansha ko’p pul ajratsam, Ol meni sonshelli bay qiladi dep oylaydi. Duris, Quday ushin berip atirg’anlardi Ol a’lbette jarilqaydi. Bul haqqinda aniq jazilg’an jerler de bar. Bul bolsa bizlerdin’ Qudayg’a bolg’an sadiqlig’imiz ha’m boysiniwshilig’imizdi belgilep beredi. Quday ha’r bir adamnin’ ju’regine qaraydi ha’m sol boyinsha adamlardi hu’kim etedi. Bul haqqinda da Eski Kelisimde Malaxiya payg’ambar jazip o’tken. Izrail xalqi Qudaydin’ atin hu’rmet etpey qoydi ha’m Og’an boysinbay qoydi.

Quday olardi o’z nizamlarin saqlap qalmag’ani ushin ayiplaydi. Quday Izrail xalqina hesh qashan, Mag’an tabisin’izdan on protsentin ajiratin’, son’ qa’legen islerin’izdi qila berin’, Men ba’ribir sizlerdi jarilqay beremen dep, aytpag’an. Yaq, Quday hesh qashan bunday demegen. Tek g’ana Izrail xalqina emes, al bizlerge de bunday jol tutiwdi aytpag’an.

Iyemiz Iysa Matta kitabinin’ besinshi babi jigirma ushinshi ayatinda bilay deydi: “Sonliqtan eger de sen qurbanlig’in’di qurbanliq oring’a alip kelgenin’de, tuwisqanin’nin’ sag’an o’kpeli ekeni sol jerde esin’e tu’sse, qurbanlig’in’di sol jerde, qurbanliq orinnin’ aldinda qaldirip, a’wele tuwisqanin’a barip, onin’ menen jarasip al! Son’inan qaytip kelip, qurbanlig’in’di Qudayg’a ber”. Solay etip, Iysa Quday ha’mme waqit bizlerdin’ ju’regimizge qaraytug’inin aytadi. Doslar, bizler Og’an qanday ju’rek penen kelip atirmiz.

Og’an berip atirg’an qurbanlig’imiz shin ju’rekten be? Basqalar menen bolg’an mu’na’sa’betimiz jaqsima? Sebebi bizlerdin’ Og’an alip kelgen qurbanlig’imizdan go’re ju’regimizdin’ qanday ekenligi Ol ushin a’hmiyetlirek.

Quday sizlerdi jarilqasin qa’dirli tin’lawshi tuwisqanlarimiz. Shan’arag’in’izdi Iyemiz O’zi bereketlesin. Usinin’ menen bu’gingi esittiriwimizdi usi jerde juwmaqlap sizler menen xoshlasamiz. Xosh saw-salamat bolin’.