Assalawma a’leykum esittiriwlerimizdin’ qa’dirli tin’lawshilari. Sizler menen efir arqali ushrasip turg’animnan quwanishliman. O’mirimizde ha’r birewimiz ushin a’hmiyetli bolg’an na’rse bul den -sawliq. Eger azg’antay awirip qalsaq, qolimiz hesh na’rsege barmay qaladi. Ku’shimiz de bolmaydi. Eger kishkene balalarimiz awirip qalsa, ku’n boyi tek g’ana olardin’ ta’wir bolip ketiwi haqqinda oylap ju’remiz. Qolimizdan kelgen barliq xizmetti ju’girip qilamiz. Ha’r qiyli shipakerlerge ko’rsetiwge ha’reket etemiz.

O’zlerimiz bilgen xaliq arasindag’i da tu’rli emlew usillarin qiliwg’a ha’reket etemiz. Eger emley alsa barliq tanislarimiz, tuwisqanlarimizg’a usi emlew usili menen bo’lisemiz. A’lbette hesh kimnin’ kesel boliwin qa’lemegen bolar edik. Biraq ha’zirgi ku’nleri tu’rli kesellikler ku’nnen ku’nge ko’beyip baratir.

Sonin’ ushin doslar, ha’r birewimiz o’zlerimizdi bul keselliklerden qorg’ap ju’riwge ha’reket etiwimiz kerek. Eger meditsina ta’repinen alip qaraytug’in bolsaq, a’piwayi grippke qarsi, ha’zirgi ku’ni ha’r tu’rli da’ri-da’rmanlar bar. A’lbette bizler olardan paydalaniwimiz mu’mkin. Biraq en’ a’hmiyetlisi, duris paydalaniwdi biliwimiz kerek boladi.

Sebebi meditsinanin’ aytiwinsha, naduris qollanilg’an da’riler insan organizimine kerisinshe ta’sir etiwi de mu’mkin. Sonin’ ushinda qa’dirli tin’lawshilar a’lbette shipaker menen so’ylesip is ju’rgizgen ma’qsetke muwapiq boladi.

Ha’r bir insan o’z organizimin tu’rli keselliklerge qarsi tura aliwin ta’minlep biliwi lazim. Onin’ ushin bolsa ha’r bir insan o’z organizimin shiniqtirip biliwi de kerek. Ayrim waqitlari balalardi ha’dden tis issi qilip kiyintirip qoyg’anina ko’zlerimiz tu’sedi. A’lbette bul balalarimizdi suwiqtan asraydi, biraq sol balalar sa’l suwiqqa shidamsiz bolip qaladi. Na’tiyjede tu’rli keselliklerge a’sirese qis ku’nleri tez-tez gripp bolip qalatug’in boladi.

Suwiq ku’nleri ha’dden tis qalin kiyinip ju’rgennen ko’re ayaqti issi saqlaw a’hmiyetlirek dep oylaymiz. Sebebi ayaq kiyimlerimiz izg’ar boliwinin’ na’tiyjesinde ayazlaw, jo’tel ha’m sog’an uqsas tu’rli kesellikler kelip shig’iwi mu’mkin. Ko’pshilik adamlardin’ pikirlerinshe suwiq hawadan ko’re issi hawada keselleniw an’satraq boladi eken. Bunin’ qa’nshelli duris yamasa naduris ekenin bizler aniq bilmeymiz. Biraq ha’r bir ga’p yamasa ha’zildin’ tu’binde de azmaz bolsada haqiyqat jatiwin ha’mmemiz jaqsi bilemiz.

Doslar, kesellik bizlerden sorap otirmaydi. Ol qa’legen waqtinda qa’legen adamlarg’a japisiwi mu’mkin. Tu’rli keselliklerden en’ jaqsi qorg’awshi bolsa, bul Aspandag’i A’kemiz. Ha’r ku’ni balalarimizdin’ ha’m shan’araq ag’zalarimizdin’ den-sawlig’i ushin Qudaydan sorayiq. Sebebi tek g’ana Ol bizlerge shipa bere aladi. Qa’dirli tuwisqanlar usinin’ menen bu’gingi esittiriwimizge usi jerde juwmaq jasap sizler menen keyingi esittiriwimizge shekem xoshlasamiz. Xosh saw-salamat bolin’.