Assalawma a’leykum qa’dirli radio tin’lawshi tuwisqanlar. Sizler menen ja’ne radio tolqinlari arqali ushrasip turg’animiz ushin Qudayimiz bolg’an Atamizg’a shu’kirlik aytamiz. Ma’rhamat tin’lan’, efirde “Danaliq” radiosi.

III-a’sir. Bu’l a’sirde iseniwshi sha’kirtler tamaninan egilgen tuqimlar a’ste-qirinliq penen hasil bere basladi. Endi ja’ma’a’tke wa’zirler na’zerlerinen shette qalmay joqari na’zer menen qaray basladi. Geypara wa’zirler o’zlerine grekshe hu’rmetli “Papas” yag’niy, “Ata” degen atti aldi. Qa’dirli tuwisqanlar, bul jerde bir soraw payda boladi. Bul jag’day Matta jazg’an Xosh xabar kitabinin’ 23 babi 9 ayatina qalayinsha uqsas keledi?

Doslar, kelin’, usi ayatti birgelikte oqip ko’remiz: “Jer ju’zinde hesh kimdi de “a’ke” dep ataman’lar, o’ytkeni sizlerdin’ jalg’iz A’ken’iz bar, Ol aspanda”. 222 jilg’a kelip Rim taxtina Aleksandr Sever otiradi. Bul imperator masixiylerge jaqsi mu’nasiybette boladi. Biraqta ol Masiyxti Quday dep tan’ almag’an. Tap sol hu’kimdar birinshi bolip masixiylerge jiynalislar o’tkiziw ushin ibadatxanalar qurilisina ja’rdem beredi. Rim imperiyasinin’ ha’mme jerlerinde masixiy ibadatxanalari diywallari tiklene baslaydi. Biraq III-a’sir aqirina kelip, ja’miyet pu’tkilley masixiylikten uzaqlasadi.

U’lken-u’lken qalalar – Rim, Aleksandriya, Antiyoxiyadag’i ja’miyet wa’zirleri bolsa “Patriarx” emes, “Papa” dep atala baslaydi. III-a’sir baslarinda ja’miyette hesh qanday su’wretler bolmag’an. Usi a’sirdin’ aqirina kelip, ibadatxanalarda su’wretler payda bola basladi. Qoy bag’ip ju’rgen shopan Iysa Masiyx siyaqli, quslar Muxaddes Ruwxqa say sipatinda diywallarda payda bola basladi. Usi a’sirde na’restelerdi suwg’a shomildiriw ma’resimi baslandi. Iseniwshiler da’wirinen baslang’an quwg’inlar III-a’sirge shekem dawam etti. Masiyx ja’ma’a’ti ju’da qatti quwg’inlarg’a ushiradi. Tap sol ottin’ ishinde qalg’an siyaqli edi. Bunnan tisqari jalg’an ta’liymatlar ja’ma’a’tten iseniwshilerdi alip ketti.

Qa’dirli tuwisqanlar, usi jerinde ja’ne bir a’hmiyetli bir soraw payda bolip tur: ne ushin Masiyx ja’ma’a’ti pu’tkilley joq bolip ketpedi? Usi gezde Musa menen bolg’an waqiya esimizge tu’sedi. Bul waqiya Shig’iw kitabinin’ 3 bab 2 ayatinan 6 ayatina shekem bolg’an jerlerinde jazip qoyilg’an. Masixiyler u’lken qa’telerge jol qoyg’an bolsada, olardin’ arasinda haqiyqattanda Masiyxti su’yiwshiler ha’m Masiyx penen jaqin baylanista bolg’an masixiyler de jasag’an. Mine usinday ju’rekler Muxaddes Ruwxtin’ jerdegi ju’regi bolip esaplanadi.

Sonin’ menen qa’dirli tuwisqanlar, bugingi esittiriwimiz o’z aqirina jetti. Doslar, bizlerdin’ elektron ma’nzilimiz danaliq.com. Qa’dirli tin’lawshilar, saytimizg’a ma’rha’mat, o’zin’iz ha’m tuwisqanlarin’iz ushin kerekli mag’liwmatlarg’a iye bolin’lar, ja’ne efir arqali ushrasqansha saw-salamat bolin’.