Hu’rmetli tin’lawshilar u’rp-a’detlerge qosimsha ra’wishte bizler turmis qurg’an yamasa turmis qurajaq adam menen aramizdag’i minez ha’m ta’biyatimizdin’ pariqlarin da, itibarg’a aliwimiz kerek. Shan’araqta erkek adam az so’yleytug’in, al hayal adam kerisinshe kirisip kete beretug’in ha’m tez dos arttiratug’in tu’rdegi adamlarg’a kiriwi mu’mkin. Usinday waqitlari bizler Quday olardi solay jaratqanina ha’m oni o’zlerimizge uqsatiwg’a ha’reket etpey, qanday bolsa solayinsha qabil qiliwdi u’yreniwimiz kerek.

Jaqinda bir hayal “menin’ ku’yewim u’ndemes, ko’pshilikke qosilmaytug’in adam ha’tteki u’yimizge miyman kelse de, az so’yleytug’in adam. Men onin’ bunday minezinen ashiwlanip oni qiynaytug’in edim. U’yimizge kelgen miyman ne dep oylaydi? Ne ushin kelgen miymanlar zerikpewi ushin olar menen bir na’rseler haqqinda so’ylesip otirmaysiz? Deytug’in edim, dep aytip bergen edi. Aramizda onday hayal ha’m erkeklerdi ushratiwimiz ta’biyg’iy. Usinday waqitta adamg’a o’zinin’ hayali yamasa ku’yewinen basqa adamlar a’hmiyetli bolip qalmawi kerek.

A’dette erli-zayiplar, ku’yewi yamasa hayali ne oylawi ha’m ne qa’lewinen ko’re, ko’birek u’yge kelgen adamlar ne oylap ha’m ne qa’lewleri haqqinda ta’shwishlenedi. Sonin’ ushin olar bilip bilmey, bir-birin o’zgerttiriwge ha’reket etip tirisadi. Biraq basqalardin’ ne dep oylawinan ko’re hayalimizdin’ yamasa ku’yewimizdin’ ne oylawi a’hmiyetlirek boliwi kerek. Bizler olardi o’zgeriwge ha’reket etiwdi toqtatqanimizdan keyin g’ana olardin’ o’zgergenlerin payqawimiz mu’mkin. “Qudayim Meni O’zgert!” Turmista erli-zayiplar bilip bilmey bir-birin o’zgerttiriwge ha’reket etiwi, ha’tteki, jaqsi niyette bolsa da, turmista bolatug’in tu’sinbewshiliklerge sebep boladi. Biraq bul ha’reket paydasiz!

Doktor Govard Gendriks o’zinin’ kitabinda, Hadalsizliq etpe… Oni Su’yispenshilik penen ayt, dep jazg’an edi. Ol bul so’zlerdi: “Qudayim Sen ku’yewimdi su’yesen’, men oni o’zgerttiremen”, dep duwa etip atirg’an hayalg’a qarata jazilg’an edi. Hayali so’ytip duwa etkeni ushin hesh na’rse o’zgermedi. Keyin ol jilap, “Qudayim, men ku’yewimdi su’yemen, iltimas oni O’zin’ o’zgert”, dep duwa etkeninde, Quday olardin’ ekewin de, o’zgerttirdi!

Men ha’m hayalim ju’da ko’p ta’repleme bir-birimizge uqsamaymiz. Men o’zimnin’ arshil ha’m qirsiq ekenimdi bilemen. Men ha’mme waqit haqpan dep pikirlewge u’yrengenmen. Sonin’ ushin men Qudayg’a duwa ete basladim. Biraq men o’zime awir bir sabaq aldim. Qanday deysiz be? Hayalim emes, men o’zim o’zgeriwim kerek ekenligin tu’sindim. Menin’ arshillig’im, menmenligim ha’m qirsiqlig’im o’zgeriwi kerek bolg’an eken. Men o’zimde usilardi ko’rip, siniq tu’rde kishipeyillik penen Qudaydin’ aldina kelip, “Jaratqan Iyem, meni o’zgert!” dep duwa ettim. Menin’ biybaha Qudayim o’mirimde en’ a’jayip is qildi – Ol meni ha’m hayalimdi o’zgertti!”

Su’yispenshilikte bir-birimiz benen kishipeyil, mu’la’yim, ha’m sabirli bolayiq. Bul na’rseler sizlerde barma? Kishipeyillik? Mu’la’yimlik? Sabirliq? Su’yispenshilik penen qabil qiliw? Bular sizlerdin’ shan’arag’in’izda barma? Bul siyaqli su’yispenshilikti qabil qiliwg’a sizde kishipeyillik ha’m ku’sh jeterli me?

Qa’dirli tin’lawshilar, bizler Quday tiykar salg’an ha’r bir shan’araqtin’ bekkem boliwin qa’leymiz. Usi tilegimiz astinda sizlerge usi temamizdi jetkeriwge ha’reket ettik. Shan’arag’in’izda su’yispenshilik ha’m tinishliq hesh jog’almasin!