Balalar urpag’imizdi dawam ettiriwshi kishkene ju’ldizlar bolip, olar menen o’mirimiz mazmunli o’tedi. Olar ko’zlerimizdin’ quwanishi. Gu’llerge g’amxorliq etkenimizdey, balalarimizg’a da g’amxorliq ha’m miyrim kerek.

A’dette, na’reste tuwilg’aninan son’, olarg’a ju’da u’lken itibar menen g’amxorliq etemiz. Olardi su’yip erkeleymiz. Gey birewler balalari u’lkeygen sayin o’zin-o’zi epleydi dep, balalarina kem itibar beretug’in bolip qaladi. Usi pikir menen balalarin qarawsiz taslap qoyadi. Bala o’z ata-anasinan jetirli tu’rde miyrim ha’m ta’rbiya almasa, ol keleshekte qiyin ma’seleler keltiretug’in, basqalarg’a azap beretug’in insan bolip jetisiwi mu’mkin eken.

Balag’a ta’rbiyani qaysi waqittan baslap beriw kerek? Balamiz bizlerdin’ so’zimizdi tu’siniwdi baslag’annan keyin ta’rbiyalap baslawimiz kerek eken. Gey bir balalar 9-10 ayg’a jetken de anasinin’ ga’pin tu’sinedi. Sol waqittan baslap ne mumkin, ha’m ne mu’mkin emes ekenligin tu’sindirip barayiq. Ha’r sapari pikirimizde bekkem turayiq. Bir na’rse mumkin emes bolsa, ha’r sapari balamiz usi na’rseni uslamawina itibar bereyik. Bir sapari mu’mkin bolmag’an bolsa, keyingi sapari is penen ba’nt bolip, balamizdi itibarsiz qaldirmayiq.

G’a’zep ha’m jerkenish penen jazalap qoyiwdan abaylayiq. Sebebi balalarimiz bizlerdi jaqsi sezedi. Jazalawdan aldin o’zlerimiz tinishlanip aliwg’a ha’reket eteyik. Balalarimizdi ga’zep penen emes, al su’yispenshilik penen jazalawimiz kerek eken. Onin’ etken isinen g’a’zeplengenimiz ushin emes, al onin’ qa’tesin tuwrilaw ushin ja’rdem bereyik. Ha’r bir bergen jazamizdin’ shegarasinan o’tip ketpeyik. Sonda balalarimiz ata-anasi o’zlerin jaqsi tuta alatug’in adamlar ekenin ko’redi. Tosattan bolg’an qa’teler ushin olardi jazalamayiq.

Dana Sulayman patsha o’zinin’ Hikmetler kitabinda bilay jazg’an edi: “Balasin jazalamag’an insan, perzentin jaqsi ko’rmeydi, perzentin su’ygen adam oni jaslig’inan baslap ta’rtip intizamg’a u’yretedi”.

Qus u’yasinda ko’rgenin qiladi. Sonin’ ushin jaqsi o’rnek boliwg’a ha’reket eteyik. En’ jaqsi ana yamasa en’ jaqsi a’ke boliwg’a tirisayiq. Shan’araq ha’m u’yimiz perzentlerimiz ushin en’ jag’imli jer bolsin.

Bizler bulardi qila alamiz. Balalarimizdi Quday O’zi saqlasin. Qa’dirli doslar, bizlerdi tin’lag’anin’iz ushin raxmet. Bul temamizg’a ja’ne tez arada qaytamiz. Bu’gingi temamiz boyinsha pikirlerin’iz bolsa, bizlerdin’ danaliq.com saytimizg’a jazip jiberin’. Xosh saw-aman bolin’.