Assalawma a’leykum qa’dirli tin’lawshilar. Bizler sizlerge ha’r sapari ushrasqanimizda Muxaddes Kitaptag’i adamlardin’ o’mirleri tuwrali bo’lisip atirmiz. Olardin’ o’mirlerinen o’rnek alip, o’mirde tuwri joldan adaspay ju’riwimiz mu’mkin. Sa’wbetlerimiz haqqinda qanday da bir pikirlerge iye bolsan’iz, yamasa olar haqqinda ko’birek mag’liwmatqa iye bolsan’iz, bizlerdin’ saytimizg’a mira’t etemiz, pikirlerin’izdi elektron ma’nzilimizge jiberin’. Bizler bolsa sizlerge ha’r sapari jan’a dan jan’a pikirler beriwde dawam etemiz.
Bu’gin patsha ha’m payg’ambar Dawittin’ a’tirapinda bolg’an sadiq adamlardin’ biri Ittay haqqinda sa’wbetlesemiz. Ittay ati Muxaddes Kitapta ko’p aytilmag’an. Ol tuwrali 2 Patshalar 15 bapta oqiwin’iz mu’mkin.
Muxaddes Kitapti oqip otirip usi adamnin’ atina ko’zim tu’sti. Ol shin ju’reginen Dawitti su’yetug’in, oni Quday tan’lag’an patsha retinde hu’rmet etetug’in adam bolg’an eken. Dawit onin’ negizi qay jerden ekenligin jaqsi biletug’in bolg’an. Sebebi Muxaddes Kitapta bilay jazilg’an: “Bir xabarshi Dawitqa kelip: – Izraillilardin’ kewli Abshalomg’a awip ketti,-dedi. Sonda Dawit Erusalimde o’zi menen birge bolg’an barliq xizmetshilerine: – turin’lar, qashayiq! Bolmasa Abshalomnan qaship qutila almaymiz. Da’rhal ketip qalmasaq, Abshalom izimizden tez jetip alip, ba’lege duwshar eter, qalani da qilishtan o’tkerer…Solay etip, patsha pu’tkil saray xalqin izine ertip, jolg’a shiqti. Al sarayg’a qarap turiwi ushin, on toqalin sol jerde qaldirdi. Patshanin’ xizmetshileri, keretler menen peletlerden aling’an ta’n saqshilar ha’m Gattan o’zine erip kelgen gatli alti ju’z a’sker patshanin’ aldinan ju’rip o’tti.” (2 Patshalar 15:13-18)
Patshanin’ a’skerlerinin’ arasinda Gat qalasinan kelgen Ittay ha’m bar edi. Gat bul Orta jer ten’izi jag’asinda jaylasqan bolip, filistlerdin’ bes tiykarg’i qalalarinin’ biri edi. Ol filistlerdin’ qalasinan kelgen bolsa da, Dawitti ju’da hu’rmet etetug’in edi. Patsha Gatli Ittayg’a bilay dedi: “Nege sen de bizler menen kiyatirsan’? Izin’e qaytip, jan’a patsha menen qal. Qudaydin’ su’yispenshiligi ha’m sadiqlig’i sag’an yar bolsin!” (2 Patshalar 15:19-20) Patsha Dawit onin’ awhalin jaqsi tu’sinip, og’an an’sat boliwi ushin oni arqag’a qaytiwg’a u’ndegen.
Biraq Ittaydin’ patshag’a hu’rmeti ha’m sadiqlig’i ju’da ku’shli edi. “Taqsir, tiri Jaratqan Iye haqi aldin’izda ant iship aytaman: o’lim ushin bolsa da, o’mir ushin bolsa da, siz qay jerde bolsan’iz, qulin’iz bolg’an men de sol jerde bolaman, dep juwap berdi. Sonda Dawit Ittayg’a: “Yaqshi, onda aldig’a o’tip ju’re ber, – dedi.” Solay etip Gatli Ittay ha’m onin’ janindag’i ha’mme adamlar bala-shag’alari menen birge jolin dawam etti.” (2 Patshalar 15:21-22) Patsha Dawit Ittaydin’ bul ga’plerin esitip qatti ta’sirlengen boliwi mu’mkin. Sebebi o’z qa’wiminen bolg’an Izrail xalqi onin’ uli menen birlesip, og’an qarsi shig’ip turg’an waqitta filistler qalasinan bolg’an bir adam, og’an sadiqliq ko’rsetip atir edi. Bul ha’mmenin’ de qolinan kele bermeytug’in batirliq edi.
