Bizler du’nyadag’i en’ a’jayip kitap bolg’an, Muxaddes Kitapti ha’mme waqit u’yreniwde dawam etiwimiz lazim. Quday bizlerdin’ Oni tanip biliwimizdi, Onin’ kimligin, Ol ne qilip atirg’anin ha’m Oni insan retinde ha’m biliwimizdi ju’da qa’leydi.

Bizler Muxaddes Kitapti u’yrenip atirg’animizda, onin’ ishinde bolg’an waqiyalardi qanday ta’rtipte jazilg’an bolsa, tap sonday ta’rtipte u’yreniwimiz lazim. A’lbette, ko’pshiligimiz ushin bir soraw jumbaq boliwi mu’mkin. Barliq na’rseler payda boliwinan aldin, neler bolg’an degen soraw berewimiz mu’mkin. Perishteler qalay payda bolg’an? A’lbette bul haqqinda ko’pshiligimiz bilmeymiz.

Biraq usig’an uqsag’an sorawlardin’ ishinde en’ a’hmiyetlisi, xa’zir Quday qaerde degen soraw boladi. Bul sorawlarg’a toliq juwap aliwimiz ushin, ha’r birewimiz Muxaddes Kitapti oqip u’yreniwimiz lazim. Sebebi Quday Muxaddes Kitap arqali usi ha’m basqa ko’plegen sorawlarg’a juwap beredi!

A’lbette jaratilis haqqindag’i sorawlarimizg’a Jaratilis kitabin u’yreniw arqali juwaplar tabamiz. Sebebi Quday du’nyanin’ jaratilis tariyxin usi kitapta jazip baslag’an. Jaratilis kitabi – ol Muxaddes Kitaptin’ tiykari esaplanadi.

Oni tu’siniwimiz ushin, bizler tiykarin qariwli etiwimiz lazim. Muxaddes Kitap ha’r birewimizdin’ su’yikli kitabimiz boliwi kerek. Qudaydin’ So’zin u’yrengenimizde, bizler ha’r ku’ni o’zlerimiz mu’ta’j bolg’an ja’rdemdi aliwimizdi biliwimiz kerek. Sebebi tek g’ana Muxaddes Kitap, ha’r birewimizge Qudaydin’ qanday ekenligi haqqinda ha’m sonin’ menen birge bizlerdin’ sorawlarimizg’a aniq juwap bere aladi.

Jaratqan Iyemiz ju’da a’jayip! Muxaddes Kitapti qansha ko’p oqisaq, oni ja’ne de ko’birek oqiwdi ha’m jaqsiraq biliwdi qa’leymiz. Muxaddes Kitap du’nyadag’i en’ a’jayip kitap dep arqayin ayta alamiz, sebebi Ol Qudaydin’ So’zi. 2 Timofey 3:16 “Muxaddes Jaziwlardin’ ha’mmesi Qudaydin’ Muxaddes Ruwxinin’ ilhami menen jazilg’an” dep aytadi ha’m bul ha’r ta’repleme duris aytilg’an. Sebebi Quday, payg’ambar dep atalg’an adamlarg’a so’ylegen. Quday, payg’ambarlarg’a O’zi bergen xatlardi jaziwdi buyirg’an.

Olar Qudaydin’ So’zin qalay esitken bolsa, solayinsha, hesh o’zgertpey jazip alg’an. Bazi waqitlari Quday dawisin shig’arip ha’m so’ylegen. Gey bir waqitlari Ol so’zin tuwridan-tuwri olardin’ an’ilarina jollag’an. En’ baslisi, Muxaddes Kitaptag’i hesh bir payg’ambarlishiliq birewdin’ jeke tu’sindirmesi emes. Sebebi Muxaddes Kitaptin’ 2 Petr kitabinin’ 1:21 ayatinda bilay aytilg’an “O’tkeni hesh bir payg’ambarshiliq so’zi adamnin’ qa’lewi menen aytilg’an emes. Al Muxaddes Ruwx ta’repinen basqarilg’an adamlar Qudaydin’ so’zlerin aytqan.” Muxaddes Kitap – ol adamlardin’ dana pikirlerinin’ toplami emes, al Qudaydin’ So’zleri bolip tabiladi. Quday O’zinin’ So’zlerin adamlarg’a bergen. Quday Muxaddes Kitaptin’ avtori. O’zinin’ So’zlerin jazdiriw ushin 40 tan aslam adamlardi qollang’an. O’zinin’ So’zlerin jazdiriw ushin barliq adamzat arasinan tek g’ana yahudiylerdi tan’lag’an. Muxaddes Kitap birden jazilmag’an. Ol toliq jaziliwi ushin aradan 1600 jil waqit o’tken!