Qiyinshiliqlar ha’m ta’shwishlerge ko’milip qalg’an waqitlarimizda, Quday duwalarimiz ha’m iltimaslarimizdi esitpey atir dep oylaymiz, sebebi bizler tezirek juwap aliwg’a asig’amiz. Biraq bizler barliq na’rseni Qudaydin’ qollarina isenip tapsiriwdi biliwimiz ha’m u’yreniwimiz kerek eken. Duwalarimizg’a tez araliqta juwaplar almag’animiz, Quday bizlerdi esitpeydi degeni emes, al kerisinshe, Ol bizlerdi barqulla esitedi ha’m su’yedi! Buni bizler Onin’ Muxaddes So’zinde tapsaq boladi, 1 Yuxan 3:20 ayatta bilay aytilg’an: “O’ytkeni Quday ju’regimizden ulli ha’m Ol ha’mme na’rseni biledi”.

Keyingi ayatlarda bizler Qudaydin’ waqit saati ha’mme waqit duris ha’m a’jayip ekenin ko’remiz.

Quday sabirli. 2 Petr 3:8-9 “Su’yikli tuwisqanlarim, tek minani esten shig’arman’lar: Jaratqan Iyenin’ na’zerinde bir ku’n min’ jilday, min’ jil bir ku’ndey. Ayirimlar keshikti dep esaplag’anday, Iyemiz wa’desin orinlawdi keshiktirip atirg’an joq. Kerisinshe, Ol hesh kimnin’ nabit boliwin qa’lemey, ha’r bir adam ta’wbe etsin dep, sizler ushin sabirliliq penen ku’tip turipti”.

Bizler o’zlerimizdin’ duwalarimizg’a juwap alalmayatirg’anday qilip seziwimiz bul sabirsizlig’imiz sebepli eken. Quday, Ol sabirli, sonliqtan bizler ha’m sabirli boliwimiz kerek. Ko’binshe o’zlerimizdin’ jag’daylarimizdi basqalarg’a ko’p salistiramiz. Ne ushin basqalar duwalarina juwap aladi, men juwap almayatirman dep ko’p oylanamiz. Duwalarimizg’a, o’mirlerimizdegi o’zgerislerge, sorag’an na’rselerimizge juwap almay atirg’animizdin’ ha’m o’zine ta’n ma’qseti ha’m sebepleri bar ekenligin tu’siniwimiz lazim.

Qudaydin’ waqiti. Eklesiyast 3:1 “Ha’mme na’rsenin’ o’z waqit saati bar”.

Quday bizlerge bul du’nyada jasaw an’sat boladi dep hesh qashan aytpadi, kerisinshe, ha’mme na’rseni o’z waqit saati bar degen. Eger 8 ayatqa shekem oqiwdi dawam etsen’iz, awir ha’m jen’il na’rselerdin’ o’mirimizde bolip o’tetug’inlig’in aytqanin ko’rsek boladi.

Bu’gingi ku’n menen jasaw. Hikmetler 27:1 “Erten’gi ku’n menen maqtanba, Onin’ ne alip keletug’inin bilmeysen’”.

Ha’r ku’ni azanda oyang’animizda Qudayg’a shu’kirshilik bildiriwimiz ju’da a’hmiyetli. Ha’r birimizge sawg’a retinde berilgen bul o’mirimizdi, ha’r bir ku’nimizdi, quwanish ha’m shu’kirshilik penen o’tiriwge ha’reket eteyik, sebebi ertengi ku’n qanday boliwin bilmeymiz.

U’mit ha’m Keleshek. Eremiya 29:11-12 “Men sizler ushin du’zgen jobalarimdi O’zim bilemen, – deydi Jaratqan Iye. – Bul jobalarim sizlerge apat emes, al abadanshiliq alip keledi, keleshekke u’mit bag’ishlaydi. Sonda sizler Meni shaqirasiz, kelip, Mag’an duwa etesiz. Men de sizlerdi esitemen”.

Quday ha’r birimizdin’ o’mirlerimizdi rejelestirgen, Onin’ rejesine qa’nshellim iseniwimiz baxtimizdi aniqlap beredi. Bizler duwa etkenimizde Quday menen o’zlerimizdin’ qarim-qatnasig’imizg’a jol ashamiz. Bul bizlerdin’ birinshi basqalarg’a qarag’anda Og’an kele alawimizg’a mu’mkinshilik jaratadi. Yag’niy bizlerdin’ Qudayg’a bolg’an boysiniwimizdi ha’m Onin’ bizlerge bolg’an ulli rejesin ko’rsetedi.

Qa’dirli doslar, Jaratqan Iyemizdin’ belgilegen ha’m rejelestirgen waqit saati menen jasaw qanday a’jayip. Doslar, sizler menen bul sa’wbetimizdi ha’zirshe juwmaqlap, keyingi ushrasiwimizda ja’ne dawam etemiz. Xosh saw-salamat bolin’.