Assalawma a’leykum hu’rmetli tin’lawshilar. Eger atirapqa na’zer salsaq o’mirdin’ qa’nshellim tezlik penen aldig’a baratirg’anin ko’rsek boladi. Adamlar ha’mme waqit ba’nt, bir jerlerge asiqqan, bir na’rselerdin’ u’stinde tartisqan, baqirisqan, ha’m tag’i basqa da ta’shwishler menen a’were. Bu’gingi ku’nnin’ adamlari rastan ha’m tinishlanip, adamgershilik haqqinda oylap ko’riwdi umitqan. Du’nya ha’m o’mir aldin’g’idan ko’p o’zgergenin ha’mmemiz jaqsi bilemiz. Bilip tursaq ha’m o’zgertiwge intilmeymiz. Insan bul du’nyanin’ ag’imina qosilip, ashiwlanip, asig’ip o’mirin jasap taslag’anin ha’m bilmey qaladi eken. “O’mir qiyin bolip ketti”. “Pul tabiw ushin eshektey jumis islew kerek” degen so’zlerdi ko’p esitemiz.
Shin menen adamlar jaqsi jasaw ushin, basqalardan kem bolmaw ushin, o’z qolayliqlarina iye boliw ma’qsetinde tinbay miynet etip kelyatir. Tinimsiz miynet, bayliq ha’m qolayliliq, adamlardi ha’dden ziyat haldan taydirip, o’zinen basqa hesh kimdi oylamaytug’in qilip qoyip atir. Bu’gin o’mirimizdi, basqalar menen qarim-qatnasimizdi jaqsilawg’a sa’l bolsada ja’rdem beretug’in “mula’yimlik” haqqinda sa’wbetlesiwdi maqul ko’rdik. Mu’la’yimlik bul o’zi ne? Mu’la’yimlik – bul adamlardin’ ha’r qiylilig’in hu’rmet etiw, bir-birimizdin’ sezimlerimizge itibarli ha’m sabirli boliw bolip tabiladi.
Mu’la’yimlik ko’p hallarda bir yamasa bir neshe adamlardin’ artiqsha g’azepleniwlerinin’, ashshi so’zlerdin’ aldin aladi. Muxaddes Kitap mu’la’yimlik haqqinda bilay degen: “Isenimi ku’shli bolg’an bizler tek o’zimizdin’ ma’pimizdi oylamay, isenimi ha’lsiz bolg’anlardin’ ha’lsizliklerin ko’terisiwge parizlimiz” (Rimlilerge 15:1). “Hesh kimdi o’sek qilmay ha’m ja’njelkesh bolmay, mu’la’yim bolip, ha’mme adamlarg’a ha’r ta’repleme jumsaq qatnasta bolsin” (Titus 3:2). Ha’r jerde bir “qiyin” adam boladi. Bunday adamalrdin’ o’zgeshe mu’ta’jlikleri boladi, ba’lkim ju’reginin’ bir shetinde qapagershiligi boliwi mu’mkin. Olarda bul na’rseler basqalarg’a unamaytug’in qiliqlar qiliwina sebepli boladi. Bunday adamlardin’ barlig’ina nalimayiq.
Onday adamlar menen urisiwdin’ paydasi joq, tek g’ana o’zin’izdin’ ashiwlang’anin’iz qaladi. Oylap ko’rsek Quday bunday adamlardi bizlerdin’ ha’m olardin’ paydasi ushin atirapimizg’a qoyg’an boliwi mu’mkin. Bunday adamlarg’a sabirli boliwimiz benen mu’la’yimlikti o’zimizde ja’ne de rawajlandiramiz. Qansha qiyin bolmasin onday adamlarg’a hu’rmet ko’rsete bereyik. Bul olardin’ bizlerge bolg’an qarim –qatnasin o’zgerttiredi. Bunday sharayitta Muxaddes Kitap Qudaydin’ So’zi bizlerge jaqsi ma’slahat beredi : “Bir-birin’izdi tuwisqanliq su’yispenshilik penen shin ju’rekten su’yin’ler. Bir-birin’izge o’z-ara hu’rmet ko’rsetiwge tirisin’lar” (Rimlilerge 12:10). Bul an’sat emes biraq Quday menen bunin’ ilaji bar.
