Assalawma a’leykum qa’dirli doslar! Sizler menen ja’ne efir arqali ushrasip turg’animnan quwanishliman. Mikrofon aldinda sizler menen Sarbinaz. Ha’zirgi ku’nde ko’pshilik adamlar “mol o’mir” haqqinda ko’p aytadi. Bul so’zler gey bir adamlar ushin ha’r qiyli ma’nisti bildirse, al gey bir adamlarg’a qalanin’ sirtinda u’lken jay, garajinda eki avtomobil, televizor, videotexnika ha’m materialliq bayliqlardi ko’z aldilarina keledi eken.
Ko’pshilik adamlar ushin jaqsi o’mir – bul materialliq jetispewshilikleri bolmag’an o’mirdi tu’sinedi. Iyemiz Iysa Masiyx Og’an isengenler mol o’mirge iye boliwlari ushin kelgen. Biraq Iysa “mol o’mir” degen de basqa ma’nisti aytadi. Ol qutqariliw, azatliq, ha’m ruwxtin’ qanig’iwi haqqinda aytqan. Qutqariliw gu’nanin’ jazasinan, a’wmetsizlikten, qa’telerden ha’m jetispewshiliklerden azat boliwdi bildiredi. Erkinlik gu’nanin’ qulinan azat boliwdi bildiredi.
Qanig’iw Iyemizdin’ barliq mu’ta’jliklerimizdi toldirip ha’m bulardin’ barlig’i o’mirlerimizdi bay ha’m mol qilatug’inin bildiredi eken. Bizler material jag’inan qa’nshellim bay bolmayiq, Iysa beriw ushin kelgen na’rselerge iye bolmasaq, bizlerge “mol o’mir” jetispeydi.
Yuxanna kitabinin’ 6:35 ayatinda Iysa bizlerge bilay degen edi: “Men – o’mir naniman. Mag’an kelgen adam hesh qashan ash bolmaydi ha’m Mag’an isengen adam hesh qashan sho’llemeydi.” Rimlilerge jazilg’an xattin’ ha’m 12:2 ayatinda Quday bizlerdin’ bul o’mirde qalay jasawimizdi aytadi “Bul du’nyanin’ adamlarina eliklemen’ler. Al Qudaydin’oy-pikirlerin’izdi jan’alap, Onin’ sizlerdi toliq o’rgertiwine jol qoyin’lar. Sonda sizler Qudaydin’ jaqsi ha’m minsiz erkin, yag’niy Og’an nenin’ unaytug’inin ayirip bilesizler” degen edi. Demek, usi So’zleri arqali Quday bizlerdin’ erkin, jaqsi ha’m mol o’mir su’riwimizdi qa’leytug’inin bilsek boladi.
Hu’rmetli doslar, Iysa bizlerdi elege shekem shaqiradi, kelin’ Og’an shin ju’regimiz benen aldina keleyik, ta’wbe eteyik, Ol menen waqit o’tkizeyik. Sebebi bilemiz birinshi azanda turip Quday menen baslag’an ku’nimiz a’lbette jaqsi ha’m o’nimli o’tedi. Onin’ bizlerge berip atirg’an taza, tawsilmas jarilqawin qabil eteyik. Aspandag’i Iyemizge sheksiz alg’islar bolsin dep qa’dirli doslar sizler menen keyingi esittiriwimizde ushrasqansha dep xoshsalamiz. Saw- salamat bolin’!
