Assalawma a’leykum hu’rmetli tin’lawshilar. Sizler menen radio arqali ushrasip turg’animizdan minnetdermiz. Mikrofon aldinda sizler menen men Sarbinaz. Bu’gingi esittiriwimizdi men sizlerdin’ itibarlarin’izdi bu’gingi ku’ndegi masiyxiyliqqa, ja’ma’a’tlarg’a qaratpaqshiman.
Ko’rip turg’animizday, shaytan ha’mme waqit Masiyxtin’ denesine sirtinan ha’m ishinen hu’jim qilg’an ha’m ha’zir de dawam etip kelyatir. Sonin’ ushin ha’m Iysa “Sergek bolin’lar”, dep qayta-qayta O’zinin’ sha’kirtlerine aytqan.
Bu’gingi ku’nde Muxaddes Kitapqa tiykarlang’an masiyxiyliq liberalizmge aylanip baratir desek boladi. Usi liberalizm tiri isenimdi joq qilip atir. Sebebi du’nya ja’ma’a’tqa emes, ja’ma’a’t du’nyag’a awip baratir. Ruwx erkinligi dene erkinligi menen almasip baratir. Masiyxiy boliw ha’zirgi ku’nde qiyin bolmay qaldi, sebebi ha’r bir insan masiyxiyliqqa u’yrenip kelyatir. Masiyxiyliq qurbanliqti talap etedi, misali, jaman a’detlerdi, eski gu’nalardi, Qudayg’a tuwri kelmeytug’in o’mirdi taslawdi soraydi. Biraq bulardi qurban qilmay turip insan o’zin aqlawg’a ha’reket etedi. Bir ayaq penen masiyxiyliqta, ekinshisi menen du’nyada turiw ju’da qolayli ha’m qiyin emes. Solay etip du’nyanin’ ruwxi ja’ma’a’ttegi orinlardi iyelep atir.
Ne ushin Qudaydin’ xalqi adasip baratir? Televizor, internet, erotika ha’m zorlaw menen toldirilg’an a’debiyatlar ha’mde jurnallar ja’ma’a’ttin’ gu’nag’a biyparwalig’i ha’m basqa ko’plegen na’rseler Qudaydin’ balalarin ku’shsiz qiliwg’a sebep bola aladi. Jaqinda bir tuwisqanimiz Rossiyada eki ay jasap qaytip keldi. Sol jerdegi masiyxiyliq og’an ju’da ku’shli ta’sir etipti. Biraq bul ta’sir jaqsi emes. “Siz ko’z aldin’izg’a keltire alasizba? dedi ol mag’an, masiyxiy shan’araqlar ajrasip baratir. Ketiwimnen aldin mag’an tanis bolg’an eki shan’araq ajirasip ketti. Ekiwinde de sebep bir edi, erkekleri basqa hayallardi su’yip, o’zlerinin’ shan’araqlarin, balalarin taslap ketti. Sog’an qaramay olar o’zlerinin’ ja’ma’a’tlerinde xizmet qiliwdi dawam etip atir, buni shopanlari ha’m biledi eken,”
Qa’dirli doslar, ja’ma’a’t bul – Masiyxtin’ kelini bolip esaplanadi. Kelin qanday pa’k kelin ko’ylekte bolsa, ja’ma’a’t ha’m usi pa’klikti, tazaliqti saqlap qaliwi kerek. Bul haqqinda oylasam Iysa Masiyxtin’ shirkewde qilg’an isi esime tu’sedi: “Iysa shirkewge kirip, ishte sawda –satiq qilip otirg’anlardi quwip shig’arg’an edi. “Muxaddes Kitapta: “Menin’ u’yim duwa etetu’g’in jer”, – dep jazilg’an. Sizler bolsa Qudaydin’ u’yin qaraqshilar u’yasina aylantirdin’izlar!” (Luka 19:45-46). Ja’ma’a’t dep imaratti emes, al masiyxiylerdi aytamiz. Demek, ja’ma’a’ttin’ tazalaniwi ha’r birimizden baslanadi. Shirkew bolg’an denemizge Masiyx kirgende nelerdi quwip shig’arg’an bolar edi?
Usinin’ menen bu’gingi esitttiriwimizdi juwmaqlaymiz qa’dirli doslar. Ja’ne ushirasqansha xosh saw-salamat bolin’.
